एकीकृत नेकपा माओवादीका अध्यक्ष पुष्पकमल दाहालले युद्धकालिन मुद्दालाई अदालती प्रक्रियावाट पुरा गर्न खोजिए कांग्रेस सभापति शेरबहादुर देउवा पनि आफुसँगै जेल जानुपर्ने बताएका छन् ।
बृहत शान्ति सम्झौता र युद्धकालीन मुद्दाहरु विषय अन्तरक्रिया कार्यक्रममा दाहालले युद्धकालीन समयमा बिद्रोही पक्षको नेतृत्वकर्ता दलको हिसावले आफु र राज्यको तर्फवाट दमन गर्ने नेतृत्वको हिसावले देउवा पनि जेल जानु पर्ने दिन आउने धारणा राखेका हुन । अध्यक्ष दाहालले तत्कालिन सुरक्षा प्रमुखहरु पनि युद्धकालिन पार्टीको एक हिस्सा भएकाले उनीहरु पनि सँगसँगै जेल जाने बताए ।
शेरबहादुरजीले त हाम्रो टाउकाको मूल्य तोक्नु भएको हो, उहाँ राज्यको तर्फवाट युद्धको एउटा पक्ष हो, हामी बिद्रोहीको तर्फवाट अर्को पक्ष हौंड दाहालले भने, ‘जुन दिन युद्धकालिन मुद्दाले म जेल जानुपर्छ, त्यो दिन शेरबहादुरजी पनि सँगसँगै जेल जानु पर्छ ।
दाहालले बिस्तृत शान्ति सम्झौताको मुलमर्म बिपरित युद्धकालिन मुद्दालाई ब्युँताउने कोशिस भइरहेको भन्दै आपत्ति जनाए। सत्यनिरुपण तथा मेलमिलाप आयोग र बेपत्ता छानबिन आयोगलाई नजरअन्दाज गरेर अदालती प्रक्रियावाट माओवादी शक्तिहरुलाई फसाउन लागेको पनि आरोप लगाएका छन् ।
मानव अधिकारको नाऊँमा केही ब्यक्ति बिशेषहरु माओवादीलाई सिध्याउने अभियानमा लागेको जनाउँदै दाहालले तीनको पहिचान गर्न कार्यकर्तालाई निर्देशन समेत दिएका छन्।
दाहालले एकीकृत नेकपा (माओवादी) र नेकपा–माओवादीबीच तत्काल पार्टी एकता हुने भएमा तत्काल सरकारबाट बाहिरिने समेत बताएका छन् । ‘दुई माओवादी एकता हुने हो भने सरकार छोड्नु मेरा लागि कुनै ठूलो कुरा होइन, केही समयअघि झन्डै छाडेको थिएँ, सरकार छोड्नु कुनै आइतबारको कुरा होइन’ उनले भने । अध्यक्ष दाहालले पार्टी एकता हुनका लागि सरकार बाधक हुने भए आफैँले तत्काल सरकार छोड्न तयार रहेको तर बैद्यको मुद्दा सरकारको होइन विचारको मुद्दा भएको बताए ।
0 comments
Write Down Your Responses