१) मृतक रामदुलारीको छोरा हजुरआमाको काखमा । २) प्रहरी कार्यालयमा धर्ना दिँदै स्थानीय ।
– मोहन विष्ट
महेन्द्रनगर, २४ जेठ । कञ्चनपुरमा एक महिलाको हत्या प्रेम सम्बन्धकै कारण भएको दाबी गरिएको छ । मृतकका परिवारले प्रेमीले नै हत्या गरेको दाबी गर्दै उनीसहित ६ जनाविरुद्ध प्रहरीमा उजुरी दिएका छन् ।
कञ्चनपुरको बेदकोट नगरपालिका १ चम्फापुरकी २३ बर्षीय रामदुलारी राना जेठ २२ गते शनिबार मृत अवस्थामा भेटिएकी थिइन् ।
मृत भेटिएको पाँच दिन अघिमात्रै उनी घरबाट वेपत्ता भएकी थिइन् ।
सोमबार रामदुलारीका ससुरा पदम रानाले हत्याको आरोपमा सोही ठाउँकै प्रकाश मल्लसहित उनका परिवारका ६ जनाविरुद्ध सदरमुकाम महेन्द्रनगरस्थित जिल्ला प्रहरी कार्यालयमा उजुरी दिएका हुन् । प्रहरीले उनको उजुरी दर्ता गरी थप अनुसन्धान थालेको छ ।
उजुरी दर्ता हुनुअगावै प्रहरीले हत्यामा संलग्न भएको आशंकामा प्रकाश र उनका बुवा ईन्द्र बहादुरलाई पक्राउ गरिसकेको छ ।
कञ्चनपुर प्रहरी प्रवक्ता डीएसपी केदार खनालले पक्राउ गरेका व्यक्तिको नाम सार्वजनिक गर्न नमानेपनि प्रहरी स्रोतका अनुसार प्रकाश मल्ल र उनका बाबु ईन्द्र बहादुर मल्ललाई अनुसन्धानका लागि आइतबारै पक्राउ गरिएको थियो ।
रामदुलारी र प्रकाशबीच प्रेमसम्बन्ध, श्रीमान विदेशमा
मृतकका परिवारको बयानले रामदुलारी र प्रकाश मल्लबीच केही समययता प्रेम सम्बन्ध रहेको देखाउँछ । प्रकाशले रामदुलारीका श्रीमान बिदेश भएको मौकामा पहिले एकोहोरो प्रेम गरेको मृतककी सासु भिटु रानाले बताईन् । उनका अनुसार प्रकाशले रामदुलारीलाई ‘नानु म तिमिबिना बाँच्न सक्दैन्’ भन्ने जस्ता अनैतिक प्रेम सम्बन्धका म्यासेज पठाएको थिए । ‘मैले बुहारीको मोबाईलमा यस्ता म्यासेज देखेपछि त्यही दिनदेखि सीमकार्ड निकालिदिए,’ उनले भनिन्, ‘मेरो बुहारीले पनि प्रकाशलाई चोरी–चोरी फोन गर्थिन् ।’ प्रकाशलाई मैले मेरो घरमा नआउन र प्रकाशको घरमा गएर बुहारी र प्रकाशको सम्बन्ध बारे भनेको उनले सुनाइन् ।
प्रकाशकी सानीआमा र उनको परिवारले पनि पहाडी केटाले थारु महिलासंग लाग्न हुँदैन भन्दै सम्झाएका थिए ।
त्यसपछि प्रकाशले आफूसँग सरी भाउजु म आजदेखि तपाईको घरमा आउँदैन भनेको तर, पछि मेरो बुहारीसंग माया गर्छु र तिमीबिना बाँच्न सक्दैन भन्ने रुईलाबैला गरेको रानाले बताईन् । ‘फेरि जेठ १८ गते राति आएर भाउजु म तिम्रो बुहारीसंग बिहे गर्छु, बिहेमा कति खर्च लाग्यो ? भन्ने जस्ता कुरा प्रकाशले गर्यो,’ उनले भनिन् ‘त्यस दिनदेखि मेरो बुहारी हराईन् ।’
प्रकाशले बच्चा (मृतक महिलाको छोरो) नलग्ने भन्दै बिवाहबारे मृतक महिलाकी सासुसंग कुराकानी गरेका थिए ।
हराएकी बुहारी मृत भेटिएपछि प्रकाशका नाममा उजुरी, नाबालक छोरा टुहुरो बनाएर गइन्खेतको झाडीमा मृतक रामदुलारीको शव ।
शनिबारमात्रै मृत अवस्थामा फेला परेपछि आफूहरुले उनीहरुको परिवारको नाममा किटानी जाहेरी दिएको सासु भिटु रानाले बताईन् । रामदुलारीको अढाई बर्षको एकमात्र छोरा छ । घर परिवारका अनुसार प्रेमको नाममा प्रकाशले रामदुलारीसँग पटक पटक यौन शोषण गर्दै आएका थिए । ‘यसरी श्रीमान विदेश भएको मौका अर्कासंग प्रेममा फसेपछि एकातिर आफ्नो ज्यान पनि गुमाउनु पर्यो र अर्कातिर आफ्नो दुदे बालक टुहुरो बनाइन्’ छिमेकी महिला विना विष्टले भनिन् ।
महिलाको बलात्कार गरेर यौनीमा लाठी घुसाइयोः महिला अधिकारकर्मी
महिला अधिकारकर्मीहरुले भने यो घटनामा रामदुलारीको निर्मम तरिकाबाट हत्या भएको दाबी गरेका छन् ।
उनीहरुले दोषीलाई कुनै हालतमा उन्मुक्ति दिन नहुने माग गरेका छन् ।
महिला तथा बृद्ध सेवा केन्द्रका अध्यक्ष शारदा चन्दले प्रेम सम्बन्धका नाममा रामदुलारीको बलात्कार गरेर यौनीमा लाठी घुसाएको दाबी गरिन् । यस्तो तरिकाले हत्या हुनु निन्दनीय भएको भन्दै हत्यारालाई फाँसीमा झुण्ड्याउन माग गरिन् ।
साहसी महिला नेपालकी अध्यक्ष आनन्दी रानाले थारु महिला एक्लै भएको मौकामा यस्तो चरम अत्याचार गरेको बताउदै दोषीलाई कडा कारबाही गर्न माग गरिन् ।
हत्यारालाई कारवाही गर्न माग गर्दै सदरमुकाममा स्थानीयको प्रदर्शन मृतक रामदुलारीको शव फेला परेपछि जम्मा भएका स्थानीय ।
रामदुलारीको हत्यारालाई कार्बाहीको माग राख्दै चम्फापुरका स्थानीयहरु उर्लिएर सदरमुकाम महेन्द्रनगर आएका थिए । सयौँको संख्यामा आएका स्थानीयहरुले दोसीलाई कार्बाही माग गरेका छन् । निर्मम तरिकाले हत्या गरेको भन्दै त्यस्ता हत्याराहरुलाई कडा कार्बाही गर्न माग गरिएको छ ।
उनीहरुले जिल्ला प्रहरी कार्यालयमा धर्ना समेत दिएका छन् ।
खेतको झाडीमा भेटिएको थियो शव
जेठ २२ गते शनिबार रानाको शव चम्फापुर क्षेत्रको पूर्व पश्चिम राजमार्गसंगै जोडिएको करिब सय मिटर दक्षिण खेतमा रहेको नाला छेउमा मृत अवस्थामा सडेको अवस्थामा फेला परेको थियो ।
दोषीलाई कानुनी दायरामा ल्याएरै छाड्छौंः प्रहरी
जिल्ला प्रहरी कार्यालय कञ्चनपुरले यो घटनाका दोषीलाई कुनैपनि हालतमा कानुनी दायरामा ल्याएर कार्बाही गर्ने राना परिवारसंग प्रतिबद्धता जाहेर गरेका छन् । घटनाबारे प्रहरीले अझै अनुसन्धान जारी राखेको छ ।
0 comments
Write Down Your Responses